Talat Xhaferi, kandidat për kryetar të Kuvendit të Maqedonisë së Veriut

Shumica parlamentare në Kuvendin e Maqedonisë së Veriut për kryetar të institucionit ligjvënës, kanë propozuar kryetarin e deritashëm, Talat Xhaferi. LSDM-ja dhe BDI-ja si propozuese, kanë thënë se Xhaferi gjatë mandatit të deritashëm ka dëshmuar se me sukses mund ta drejtojë këtë institucion, andaj edhe ka mbështetjen e tyre.

“Talat Xhaferi është njeriu i duhur në vend të duhur. Ai është kryetari më i suksesshëm i kuvendit, njeriu që i ka thyer tabutë se shqiptari jo vetëm që mund të jetë kryetar kuvendi, por edhe kryetar më i suksesshëm”, ka deklaruar Izet Mexhiti në emër të grupit parlamentar të BDI-së.

Edhe Lidhja Social Demokrate i ka dhënë mbështetje rizgjedhjes së Talat Xhaferi në postin e kryetarit të kuvendit, por njëri nga nënkryetarët e LSDM-së, Muhamed Zeqiri, ka drejtuar kritika ndaj Xhaferit duke e akuzuar për lidhje me ish-strukturat e qeverisë së Nikolla Gruevskit, në veçanti me ish-kryetarin e kuvendit, Trajko Veljanovski.

“Është kryetari më i suksesshëm që do të mbahet mend si kryetari i vetëm që ka amnistuar një kriminel si Trajko Veljanovski (ish-kryetar i kuvendit gjatë trazirave më 27 prill 2017)”, ka deklaruar Zeqiri.

Ndërkohë, kundër kryetarit të ri të kuvendit është shprehur edhe opozita maqedonase duke drejtuar kritika për mënyrën e drejtimit të Kuvendit në të kaluarën, në veçanti në raport me opozitën.

“Mosrespektimi i opozitës, refuzimi për çeljen e debatit për amendamentet e opozitës, ndërprerja e diskutimeve, shkelja e procedurave parlamentare, shkelja e Rregullores mbi punën e Kuvendit, janë vetëm disa nga çështjet që kanë karakterizuar punën e Talat Xhaferit si kryetar kuvendi. Nëse këto konsiderohen si punë e suksesshme e tij, atëherë kjo shumicë ka problem me përkufizimin e të qenët demokratik. Xhaferi nuk ka mbështetjen e opozitës”, ka deklaruar Nikolla Micevski nga VMRO DPMNE-ja.

Opozita shqiptare e përbërë nga Aleanca për Shqiptarët dhe partia Alternativa, akuzat e saj ndaj shumicës së re parlamentare i kishte kryesisht për, siç tha, dhunimin e votës shqiptare në zgjedhjet e 15 korrikut. Nga ky koalicion thanë se qëllimi i tyre kryesor në punën e kuvendit do të jetë mbrojtja e demokracisë.

“Si koalicion nuk do të lejojmë të shkelim premtimet e dhëna 82 mijë votuesve dhe të tyre 10 mijë të tjerëve që dolën në protesta me akuza drejtuar BDI-së për vjedhje. Pra, nuk do të lejojmë që të shkelet besa e dhënë njerëzve të cilët kanë kërkuar demokraci, por që BDI-ja dhe Talat Xhaferi së bashku edhe me Ali Ahmetin, e mohuan këtë demokraci”, ka deklaruar Skënder Rexhepi nga koalicioni opozitar shqiptar.

Kryetari i kuvendit zgjidhet me 61 vota nga 120 sa numëron Kuvendi i Maqedonisë së Veriut. Zgjedhja e kryetarit të kuvendit i hap rrugën votimit të qeverisë së re të përbërë nga LSDM-ja dhe BDI-ja.

Por, caktimi i posteve ministrore, siç bëhet e ditur, ka nxitur reagimin e disa degëve të BDI-së, të cilat kanë kërkuar përfaqësim me poste ministrore. Mirëpo, nga BDI-ja kanë thënë se debatet e tilla janë pjesë e demokracisë që ekziston brenda kësaj partie.

BDI-ja në qeverinë e re do të ketë gjashtë ministri; zv.kryeministrin e parë që njëherësh do të jetë edhe ministër i Sistemit Politik (Artan Grubi), Ministrinë e Punëve të Jashtme (Bujar Osmani), Ministrinë e Financave (Fatmir Besimi), Ekologjinë (Naser Nuredini), Ekonominë (Kreshnik Bekteshi), dhe Ministrinë e Shoqërisë Informatike dhe Administratës Publike,(ministri ende nuk është caktuar).

Lëvizja Besa, e cila ishte pjesë e koalicionit parazgjedhor me LSDM-në, do të drejtojë Ministrinë e Bujqësisë (Arjanit Hoxha), ndërsa resorët tjerë si Ministria e Brendshme dhe e Mbrojtjes, e Punës dhe Politikës Sociale, ajo e Arsimit, e Drejtësisë, e Pushtetit Lokal, Ministria e Transportit, e Shëndetësisë dhe Kulturës, do t’i takojnë LSDM-së dhe partnerëve të saj të koalicionit parazgjedhor. Votimi i qeverisë pritet të bëhet javën e ardhshme./rel

Comments are closed.

%d bloggers like this:

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close