​Platforma e mësimit online vlerësohet jo efektive

Edukimi dhe Menaxhimi i Sistemit Arsimor gjatë situatës me pandeminë koronavirus dhe kontributi i diasporës nga Gjermania, ka qenë temë e debatit të sotëm virtual të profesionistëve arsimorë nga Kosova, Shqipëria dhe Gjermania. Qëllimi i këtij takimi ishte që përmes bashkëbisedimit të trajtohen mundësitë dhe sfidat e bashkëpunimit dhe angazhimit profesional në vendet e origjinës për menaxhimin e sistemit arsimor, duke pasur parasysh dëmet të shkaktuara nga pandemia.

Njohësi dhe eksperti i fushës së arsimit, Dukagjin Popovci, ka thënë se mbyllja e institucioneve arsimore, për shkak të pandemisë, dhe kalimi i procesit mësimor në platformën online nuk është treguar efektiv për nxënësit.

Popovci: Gjatë procesit të mësimit online ka pasur edhe humbje mësimore

“Edhe ne si 91% të popullsisë të nxënëse dhe studentëve të botës, na ka zënë në befasi. Në këtë rast Kosova nuk ka qenë sui-generis, bile unë mund t’ju jap një ilustrim. Ditën kur është shpallur pandemia, Qeveria e Kosovës ka marrë vendim për mbylljen e institucioneve arsimore. Unë të nesërmen, më 12 mars, hyra në ueb faqen e UNESCO-s, duke shpresuar se do të gjej ndonjë udhëzim për organizimin e mësimit online, por nuk gjeta asgjë të dobishme. Kjo tregon se sa e papërgatitur ka qenë bota për një situatë të tillë. Se si ka qenë mësimi online, me siguri nuk ka mundur të jetë efektiv si mësimi me prezencë, pasi që mësimi online është për një moshë më tepër për arsimin e lartë, andaj gjatë këtij procesi ka pasur edhe humbje mësimore”, ka thënë Pupovci.

Drejtoresha e Qendrës për botime të diasporës, Mimoza Hysa, ka treguar se gjatë kohës sa është mbajtur procesi mësimor në distancë, kanë pasur mundësinë që të përdorin një platformë online, e cila zhvillon lëndët mësimore sipas kurrikulës së Shqipërisë. Ajo ka bërë të ditur se janë në proces të hartimit të një platforme vetëm për mësimin e gjuhës shqipe në diasporë.

Hysa: Qendra është në proces të hartimit të platformës së gjuhës shqipe për diasporën

“Situata e COVID vë në pikëpyetje të madhe mënyrën se si do të vijohet me mësimin e gjuhës shqipe, në këtë rast qendra kishte parashikuar që të ofronte njëfarë lloj platforme në ndihmës të mësuesve dhe bëri të mundur qasjen e mësuesve në platformë. ‘School me’ është një platformë e hartuar, e testuar tashmë, por nuk është posaçërisht për diasporën. Ajo është një platformë, e cila zhvillon lëndët mësimore sipas kurrikulës së Shqipërisë që përfshin klasat 1 deri 9, pra nuk kemi një platformë të përshtatshme të diasporës dhe ne shfrytëzuam resurset që ishin të gatshme. Ndërkohë qendra është në proces të hartimit të platformës së gjuhës shqipe për diasporën”, ka thënë ajo.

Për menaxhimin e pandemisë në sistemin arsimor nga Kosova ka folur udhëheqësja e divizionit për plan-programe dhe kurrikula në MASH, Feime Llapashtica, e cila ka thënë se platforma online nuk ka qenë e mirëfilltë, për shkak të situatës me koronavirus.

Llapashtica: Kosova u gjet e papërgatitur kundër pandemisë COVID-19

“Edhe Kosova sikur vendet e tjera të rajonit dhe botës u gjend në një situatë të pa përgatitur, sa i përket situatës me COVID-19. MASH në kohë shumë të shkurtër ka organizuar dhe filluar me mësimin online. A ka qenë një përgatitje e mirëfilltë? Nuk mund të themi se po, pasi ka qenë një përvojë e parë dhe mësimdhënësit kanë qenë në një pozitë jashtëzakonisht të vështirë. Në fillim ka pasur sfida jashtëzakonisht të mëdha, por me kalimin e kohës, stafi ka ndihmuar që sadopak mësimdhënia të organizohet dhe fëmijët t’i ndjekin njësitë mësimore. Sfidë tjetër ka qenë kyçja e të gjithë nxënësve duke pasur parasysh që shumica e pjesëve të Kosovës nuk kanë qasje në internet dhe pajisje teknologjike”, ka thënë ajo.

Ndërsa, mësimdhënësi nga universiteti ushtarak i Hamburgut, Muhamet Idrizi, ka theksuar se gjatë kësaj kohe kanë punuar rreth 6 muaj që të bëjnë mësimin plotësues të gjuhës shqipe si mësim të gjuhës së dytë të huaj zyrtare.

Idrizi: Askush nuk ishte i përgatitur për një sfidë të tillë

“Në momentin kur filloi mësimi dhe numri u rrit shumë, erdhi koha e koronës, nuk po flas si mësues gjerman, por për pjesën e mësimit plotësues të gjuhës amtare, patëm sfida të jashtëzakonshme, sepse askush nuk ishte i përgatitur për një sfidë të tillë, as te pala gjermane, por as nga institucionet tona shtetërore. Ne e shfrytëzuam rastin dhe luftuam rreth 6 muaj të bëjmë mësimin plotësues të gjuhës shqipe si mësim të gjuhës së dytë të huaj zyrtare. Tani, në Hamburg në vitin e ardhshëm mësimi do të bëhet për herë të parë në Gjermani i barabartë me gjuhën latine, spanjolle, turke, italiane që nuk ka qen këtu kurrë dhe nota do të vendoset në dëftesë dhe do të ketë ndikim në mesataren e cila e bën mësimin atraktiv”, ka thënë ai.

Diskutimi “Edukimi dhe menaxhimi i sistemit arsimor gjatë situatës me COVID-19 dhe kontributi i diasporës nga Gjermania”, është organizuar nga organizata GERMIN në bashkëpunim me Deutsche Gesellschaft für Internationale Zusammenarbeit (GIZ).

Comments are closed.

%d bloggers like this:

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close