PRESIDENTI THAÇI: BE-JA TA HEDHË NË TAVOLINË MARRËVESHJEN PËR NJOHJE RECIPROKE

Pas takimit me emisarin e Bashkimit Evropian në dialogun Kosovë-Serbi, Miroslav Lajçak, presidenti i Kosovës Hashim Thaçi tha se është koha që të hidhet në tavolinë mundësia për njohje reciproke, që sipas tij duhet të jetë pika e parë e marrëveshjes, pastaj çështje të tjera vijnë me lehtë dhe jo të vazhdohet me çështje teknike qe janë diskutuar më herët.

Sipas Thaçit, vetëm njohja reciproke është mundësi e mirë për të garantuar stabilitet në rajon.

“Besoj fuqishëm se ka ardhur momenti që Bashkimi Evropian, nga ajo që shoh dhe është aktualisht unik në mbështetje të zotit Lajçak, të hidhet në tavolinë mundësia e diskutimit për njohje reciproke sepse duhet të jetë pika e parë e marrëveshjes, pastaj çështje të tjera vinë më lehtë dhe jo të fillohet apo të vazhdohet me çështje teknike që i kemi diskutuar dhe ridiskutuar tash e 10 vite në Bruksel. Sido që të jetë, unë dua të besoj se vetëm njohja reciproke me standardet e përcaktuara në kornizën e marrëveshjes eventuale që mund të arrihet, mund të jetë mundësi e mirë, është edhe mundësia e vetme që garanton stabilitetin në rajon”, tha ai.

Thaçi foli edhe për takimet e fundit që ka zhvilluar në Shtetet e Bashkuara të Amerikës, Bruksel dhe Paris, për çka tha se ka parë një koordinim më të mirë në mes të kryeqendrave.

“Edhe në takimin që kam zhvilluar ditë më parë me Lajçak në Bruksel, kanë qenë po temat e njëjta të diskutimit, gjithashtu në Uashington në takimet që kam zhvilluar me autoritet e larta të larta të Shteteve të Bashkuara të Amerikës, në takime jo formale, e gjithashtu edhe në Paris pardje, shoh një koordinim më të mirë dhe nivel më të lartë edhe të Bashkimit Evropian, të kryeqendrave pra, edhe të Shteteve të Bashkuara të Amerikës, dhe ky është një mesazh i qartë, i mirë, dhe inkurajues edhe për ne në Kosovë që të jemi sa më unik, sa më të bashkuar në këtë proces të dialogut përballë Serbisë, në mënyrë që të finalizohet ky proces sa më shpejtë, sa më mirë, me njohjen reciproke të Kosovës me Serbinë”, tha ai.

Në konferencën që e mbajti pas takimit me diplomatin sllovak, Thaçi tha se diskutimi me të ka qenë në drejtim të gjetjes së mundësive për arritjen e marrëveshjes finale në mes të Kosovës dhe Serbisë që sipas Thaçit do të nënkuptonte njohjen reciproke.

Ndër të tjera, Thaçi edhe njëherë tha se Bashkimi Evropian duhet të lëvizë më shpejtë në çështjen e liberalizimit të vizave për kosovarët, që siç theksoi ai, po u bëhet padrejtësi e madhe.

Comments are closed.

%d bloggers like this:

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close