Abrashi: Kontradiktore deklaratat e PDK-së për hyrje në Qeveri

Kosova gjendet në një situatë të jashtëzakonshme për shkak të arrestimeve të Speciales, vlerëson deputeti i Aleancës për Ardhmërinë e Kosovës (AAK), Gazmend Abrashi.

Tutje, ai theksoi se imazhi i Kosovës në këtë aspekt është përkeqësuar dhe se i gjithë spektri politik pozitë dhe opozitë duhet të jenë të bashkuar.

“Mendoj që përkundër situatës të ashtuquajtur të jashtëzakonshme që e kemi për shkak të Speciales përgëzoi qytetarët për një urtësi, maturi përkundër ngjarjeve të Speciales. Kur është votuar Specialja AAK-ja nuk e ka votuar. Unë besoj që krerët politik që gjenden në Hagë do të vërtetojnë që ka qenë luftë mbrojtëse, çlirimtare dhe nuk e kam dyshimin që e njëjta do të vërtetohet, por që nevojitet kohë”.

“Jemi në situatë kur imazhi i Kosovës është i përkeqësuar dhe mendoj që i gjithë spektri politik pozitë dhe opozitë duhet të jenë të bashkuar për shkak se në të njëjtën kohë problemin e kemi edhe me Covid-19, ku situata është duke u përkeqësuar jo vetëm në Kosovë, por edhe në gjithë rruzullin tokësor”.

Ai foli edhe sa i përket çështjes së presidentit, duke theksuar se AAK-ja e ka dhënë kandidaturën dhe se nuk ndërron qëndrim.

“Çështja e presidentit është tani më veç legjitime për shkak të situatës aktuale që është në Hagë. Besoj se koalicioni do të gjejë forma për zgjedhjen e presidentit. AAK-ja e ka dhënë kandidaturën për kryetarin e Aleancës për Ardhmërinë e Kosovës”.

“Shpresoj që ky kandidat do të përkrahet nga deputetët e parlamentit të Kosovës. Sipas mendimit tim është kandidati më konsensual i mundshëm që mundet me qenë, por besoj që në ditët dhe muajt në vijim do të procedojmë edhe çështjen e presidentit”.

Ai tha se nuk e di çfarë është disponimi i PDK-së për shkak se ka deklarime kontradiktore, duke shtuar se si koalicion i kanë numrat, raporton EO.

“Unë nuk e di se çfarë është disponimi i PDK-së për shkak se ka intervista kontradiktore. E kuptoj edhe shqetësimin e PDK-së për shkak të asaj se çfarë kanë ndodhur me liderët politik të saj. Koalicioni potencial i ka numrat e vet”.

Abrashi shtoi se nuk është situata politike për zgjedhje të reja, për shkak të situatës me Covid-19 dhe speciales.

“Unë personalisht nuk mendoj që ka zgjedhje dhe mendoj që nuk është situata politike aktuale, sidomos situata që ndërlidhet me Covidin dhe situata me liderët politik në Hagë. Mendoj që për zgjedhje kemi kohë”.