Erdogan: Nëse SHBA-ja na vendos sanksione, do të ishte shenjë mosrespekti

Sanksionet amerikane për blerjen e sistemit rus të mbrojtjes raketore nga Turqia, do të ishin “mosrespekt”, tha presidenti turk, Recep Tayyip Erdogan.

Ky reagim i Erdoganit vjen pasi mediat amerikane raportuan se shumë shpejt SHBA-ja do të vendosë sanksione ndaj Turqisë për shkak të blerjes së sistemeve të mbrojtjes nga Rusia.

Rusia vitin e kaluar ka bërë dërgesën në Turqi të sistemit të mbrojtjes raketore, pavarësisht se një lëvizje e tillë ishte kundërshtuar nga Uashingtoni zyrtar, i cili kishte paralajmëruar Ankaranë se do të ndërmarrë masa.

Sipas ligjeve në fuqi në SHBA, Uashingtoni sanksionon shtetet që blejnë sasi të konsiderueshme të armëve nga armiqtë e SHBA-së, përfshirë këtu edhe nga Rusia. Por, presidenti amerikan, Donald Trump, që e kishte quajtur Erdoganin “mik të mirë”, kishte shmangur sanksionet ndaj Turqisë.

Megjithatë, teksa Trump është në javët e fundit të mandatit të tij presidencial, Washington Post raporti se ai planifikon që të vendosë sanksione ndaj Ankarasë “në ditët e ardhme për blerjen dhe testimin” e sistemit rus, S-400.

“Derisa ata (administratat amerikane) thonë me krenari se ‘ne kemi në NATO një shtet si Turqia’ dhe tani e ballafaqojnë Turqinë me sanksione, më shumë është mosrespekt ndaj një partneri të rëndësishëm të NATO-s”, tha Erdogan.

“Nuk e di se çfarë do të shkaktojë kjo (vendosja e sanksioneve) para se Trump të largohet nga presidenca, por gjatë katër vjetëve të Trumpit në pushtet, unë nuk kam pasur asnjë problem në komunikimin tim me Amerikën”, tha Erdogan për gazetarët.

Marrëdhëniet mes SHBA-së dhe Turqisë janë të tensionuara për një varg çështjesh, përfshirë edhe mbështetjen që Uashingtoni ka dhënë për milicinë kurde në Siri, që Ankaraja i konsideron terrorist, por edhe për shkak të blerjes së sistemit S-400.

Por, Erdogan ka lënë të kuptohet se marrëdhëniet mund të përmirësohen nën administratën e presidentit të zgjedhur, Joe Biden, i cili ka shërbyer si nënpresident i Barack Obamës.

“Ai është një person që më njeh shumë mirë dhe unë e njoh atë shumë mirë”, tha Erdogan.

Comments are closed.

%d bloggers like this:

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close