Ikja e mjekëve nga vendi ka vazhduar edhe gjatë pandemisë

Ikja e punëtorëve shëndetësorë nga Kosova ka vazhduar edhe gjatë këtij viti. Derisa ministri i Shëndetësisë, Armend Zemaj, kishte deklaruar se ka arritur ta ndalë ikjen e mjekëve nga vendi, një gjë e tillë është mohuar nga mjekët. Deri tani gjithsej 93 mjekë kanë bërë kërkesë për ta lëshuar Kosovën.

As pandemia COVID-19 nuk i ka ndalur punëtorët shëndetësorë ta lëshojnë Kosovën, kështu për të kërkuar punë në shtetet tjera.

Kryetari i Federatës së Sindikatës së Shëndetësisë, Blerim Syla, ka thënë për Express, se as gjatë këtij viti nuk janë ndalur kërkesat për largim nga vendi.

Aq më shumë, sipas tij, kërkesat për largim janë në rritje.

“Agjencitë të cilat i rekrutojnë këta njerëz janë duke funksionuar dhe kërkesat janë në rritje. Situata në vend është shumë e brishtë”, ka deklaruar ai.

Syla ka thënë se kushtet e punës, specializimet e pagat e ulëta, janë arsyet kryesore që po i shtyjnë punëtorët shëndetësorë ta lëshojnë vendin.

Ai është shprehur se edhe pas përfundimit të pandemisë COVID-19, kërkesat e punonjësve shëndetësorë për ta lëshuar vendin do të vazhdojnë.

Sipas tij, përsëri akterët politikë në vend nuk do ta kenë edhe më tej prioritet shëndetësinë.

“Duke e parë politikën aktuale në Kosovë nuk jam optimist. Unë e di që politikanët tanë do ta harrojnë pandeminë dhe nuk do ta kenë prioritet. Do të gënjejnë prapë në kampanja. Sindikata duhet të jetë shumë më kërkuese pas pandemisë. Me qëllim të ndaljes së ikjes ne duhet të veprojmë së bashku”, shtoi ai.

Ndërsa, nënkryetari i Odës së Mjekëve, Naser Gjonbalaj, ka bërë të ditur për gazetën se gjatë këtij viti janë bërë 93 kërkesa nga mjekët për të ikur jashtë vendit.

Sipas tij, edhe këtë vit ka vazhduar i njëjti trend i ikjes.

“Në këtë vit janë bërë 93 kërkesa dhe lëvizjet kanë vazhduar me të njëjtin trend si në vitet paraprake. Kërkesat për punësim kanë ardhur kryesisht nga Gjermania”, ka thënë ai.

Ai ka thënë tutje se duke e parë gjendjen në vend dhe nivelin e shëndetësisë, mjekët po e lëshojnë vendin, kështu për të gjetur një punë në shtetet tjera.

Përndryshe, ikja e punonjësve shëndetësorë është problematikë e cila vit pas viti po e përcjell vendin.

Tek pas përhapjes së pandemisë COVID-19 në vend është shprehur shqetësimi për mungesën e tyre.

Aq më shumë, me infektimin e këtyre të fundit, gjendja në institucione publike shëndetësore në vend është vështirësuar.

Comments are closed.

%d bloggers like this:

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close