Vdes ish-kryeministri i Shqipërisë, Bashkim Fino

Ish-kryeministri i Shqipërisë dhe deputeti socialist, Bashkim Fino ka vdekur në moshën 59 vjeçare, pasi ishte diagnostifikuar me sëmundjen COVID-19, që e shkakton koronavirusi i ri.

Gjendja tij shëndetësore në ditët e fundit ishte përkeqësuar. Qeveria e Shqipërisë shpalli për sot Ditë zie kombëtare.

Fino, ka qenë kryeministër i Shqipërisë në periudhën mars -korrik të vitit 1997. Ishte kjo koha kur në Shqipëri u formua Qeveria e Pajtimit Kombëtar, pas trazirave që u shkaktuan nga rënia e skemave piramidale.

Ai pastaj ka mbajtur disa pozita qeveritare, si zëvendëskryeministër, dhe tre herë të tjera si ministër.

Kryeministri i Shqipërisë, Edi Rama, u shpreh i pikëlluar për vdekjen e Finos derisa njoftoi se aktivitetet e fushatës zgjedhore për zgjedhjet parlamentare të 25 prillit do të pezullohen.

“E pabesueshme, po shumë fatkeqësisht e vërtetë, miku im, miku ynë i mirë Bashkim Fino nuk jeton më! Nuk kam fjalë. Sot për familjen tonë të madhe është një ditë zie, aktivitetet tona elektorale do të ndalen, në nderim e kujtim të vëllait tonë të dashur”,ka shkruar Rama në rrjetin social Facebook.

Edhe presidenti i Shqipërisë, Ilir Meta, përmes një postimi në Facebook shprehu tronditjen për vdekjen e ish-kryeministrit, Bashkim Fino.

“Ndarja e papritur nga jeta e mikut, kolegut, politikanit të moderuar dhe e Kryeministrit të Pajtimit Kombëtar në vitin e vështirë 1997, qytetarit aktiv e familjarit shembullor, Bashkim Fino, na ka tronditur të gjithëve këtë mëngjes. Dhembje e madhe, që na ka lënë pa fjalë!”, ka shkruar presidenti Meta.

%d bloggers like this:

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close